Manzil: 140104, O`zbekiston, Samarqand shahri, Universitet xiyoboni, 15-uy


Abituriyentlarga eslatma 

Abituriyent o’rnatilgan tartibda tegishli hujjatlarini ro’yxatdan  o’tkazishi, ro’yxatdan o’tkazilgan hujjatlariga mos ma’lumotlar abituriyentlar bazasiga to’g’ri kiritilganligini qaydnoma orqali tekshirib tasdiqlashi shart. Hujjatlarni ro’yxatdan o’tkazish jarayoni tugagandan so’ng abituriyentning murojaatlari (shikoyatlari) inobatga olinmaydi hamda abituriyentlar bazasiga o’zgartirishlar kiritilmaydi.

Hujjatlarni ro’yxatdan o’tkazishning muddatlari to’liq yakunlangandan so’ng, ikki hafta muddat ichida, abituriyent ruxsatnomasini Davlat test markazining  rasmiy veb-saytidan oladi. U ruxsatnomasida ko’rsatilgan sanada, vaqtda va  binoda test sinovlarida ishtirok etadi.  

Test topshiriqlari umumiy o’rta va o’rta maxsus, kasb-hunar ta’limining  umumta’lim fanlari o’quv dasturlariga muvofiq tuziladi. Test topshiriqlarini  bajarish uchun (javoblar varaqasini to’ldirish bilan birga) har 30 ta test  topshirig’iga 1 soat vaqt belgilanadi. Har bir test topshirig’i muqobil javoblari  bilan beriladi. 

Abituriyent test sinovlari o’tkaziladigan kuni binoga soat 07:00 (ikkinchi  smena soat 14:00) gacha faqat o’zining ruxsatnomasi va pasporti bilan kelishi  lozim.   

Abituriyent shaxsni identifikasiyalash vositalari  (videofiksasiya  qurilmalari va barmoq izlarini maxsus qurilmalar) orqali tekshirtirilib,  shaxsi aniqlangandan so’ng tartibli ravishda binoga kiritiladi.   

Abituriyentning shaxsi tasdiqlanmagan  (abituriyentlar bazasidagi  ma’lumotlarga mos kelmagan) taqdirda, shu joyga mas’ul etib belgilangan  nazoratchi Ichki ishlar organlari xodimi bilan birgalikda abituriyentni test  sinovidan chetlashtirish to’g’risidagi dalolatnomani rasmiylashtiradi va ushbu  abituriyentni binoga kiritmaydi. 

Binoga kirib, guruhidagi o’z o’rniga joylashgan abituriyent birinchi smenada  soat 07:45 dan 08:00 gacha, ikkinchi smenada soat 14:45 dan 15:00 gacha quyidagi  ishlarni amalga oshirishga majbur: 

test topshiriqlari kitobini nuqsonsizligini tekshirish va nuqson borligi  aniqlansa, darhol guruh nazoratchisiga xabar berish; 

test topshiriqlari kitobi raqamini o’zining familiyasi, ismi va otasining  ismi yozilgan javoblar varaqasini tegishli qismiga ko’chirib yozish va mos  doirachalarni bo’yash; 

bilim darajasini belgilovchi asosiy hujjat bo’lgan javoblar varaqasini   to’g’ri to’ldirilishini ta’minlash; 

test topshiriqlari kitobi muqovasida hamda javoblar varaqasida  ko’rsatilgan tegishli joyga familiyasi, ismi, otasining ismini yozib, imzo qo’yish.  Abituriyent test jarayonida quyidagilarni bajarishga shaxsan javobgar 

hisoblanadi:   

javoblar varaqasini bukmaslik, marker chizig’iga yozmaslik, javoblar 

varaqasidagi test topshiriqlari kitobi raqamiga mos doirachalar hamda  javoblarni belgilash qismidan tashqari boshqa qismlariga ruchka tegizmaslik; 

belgilangan vaqt davomida javoblarini javoblar varaqasiga havo rangli  pastali sharikli ruchka bilan to’ldirish; 

belgilangan vaqt tugagandan so’ng o’ziga tegishli test topshiriqlari kitobini  va javoblar varaqasini guruh nazoratchisiga topshirish. 

Abituriyent test topshiriqlari kitobida to’g’ri deb hisoblangan javoblarni  javoblar varaqasidagi mos tartib raqamli doirachadan bittasini bo’yaydi  (javoblar varaqasida bo’yalgan javoblarni o’zgartirish mumkin emas). Agar  javoblar varaqasidagi «belgilash uchun namuna» qoidasiga rioya etilmasa, bitta  test topshirig’iga javoblar varaqasida ikki va undan ortiq doiracha bo’yalsa yoki  to’liq bo’yalmasa yoxud birorta ham doiracha bo’yalmasa ushbu test topshirig’iga ball  berilmaydi. 

Abituriyentning test sinovlarini topshirish vaqtida guruhdan chiqishi  taqiqlanadi, chiqqan abituriyentlar qaytadan test sinovlariga qo’yilmaydi.  

Istisno tariqasida sog’ligi yomonlashganligi sababli test materiallarisiz,  guruh nazoratchisi kuzatuvi ostida guruhdan chiqish hollari bundan mustasno.  Guruhdan chiqqan abituriyentga qo’shimcha vaqt berilmaydi. 

Quyidagi hollar abituriyentni test sinovlari jarayonidan chetlashtirish va  test natijalarini chiqarilmaslikka asos bo’ladi:  

har qanday turdagi aloqa vositalari, kompyuter, telekommunikasiya  vositalari, rasmga oluvchi vositalar, plastik karta, sumka, soat, lug’at, jadval,  kitob, shpargalka, rangli ko’z oynaklar, qalam, ruchka, kalkulyator, lineyka, kalit,  har xil taqinchoqlar va shu kabilarni (keyingi o’rinlarda - taqiqlangan vositalar  deb ataladi) test sinovlari o’tkaziladigan hududga yoki binoga kirish joyida uni  olib kirishga harakat qilsa, olib kirgan bo’lsa yoki ulardan test sinovi davomida  foydalansa; 

test materiallarini boshqa abituriyentga uzatsa yoki ularga yordam bersa; 

test sinovlari jarayonida biri-biri bilan gaplashsa;  

test materiallarini binodan tashqariga chiqarsa, test topshiriqlari kitobi 

varag’ini yirtsa; 

test sinovlari uchun ajratilgan vaqt tugaganda test materiallarini 

topshirishdan bosh tortsa. 

Test sinovlari jarayonida abituriyent test topshiriqlari kitobidan 

qoralama sifatida foydalanish, test topshiriqlarini belgilangan muddatdan  oldin bajarish va undan so’ng test materiallarini tartib bilan guruh  nazoratchisiga topshirish hamda test sinovlari o’tkaziladigan hududdan chiqib  ketish huquqlarga ega. 

Test sinovlari tugagandan so’ng test sinovi jarayonida yozib olingan  videokuzatuvlar o’rganilganda abituriyentning test sinovi tartib va qoidalarga  amal qilmaganligi, jumladan yuqorida qayd etilgan holatlar aniqlansa, bu  holatlar uning test sinovi natijalarini chiqarilmasligiga, talabalar safidan  chetlashtirishga hamda belgilangan tartibda javobgarlikka tortish uchun asos  bo’ladi.

 

ABITURIYENTLAR DIQQATIGA!!!

Sirtqi ta’limga qabul qilish tartibi belgilandi. Xo‘sh?

Endi o‘qishga kirishda «086-U-forma» talab qilinmaydi.

 

Namunaviy test topshiriqlari va ularni yechish bo`yicha tavsiyalar

DTM rasmiy saytida “Foydali ma’lumotlar” ruknida barcha umumta’lim fanlardan o`ntadan namunaviy test topshiriqlari va ularni yechish bo`yicha tavsiyalar keltirilgan.

 


 

Abituriyentlarga darsliklar haqida

Umumiy oʻrta ta’lim maktablari, akademik litsey va kasb-hunar kollejlari (2 yillik) uchun 2018-2019 oʻquv yilida foydalanishga tavsiya etilgan amaldagi darsliklarning elektron shaklini Xalq ta’limi vazirligining Axborot-ta’lim portalidan yuklab olishingiz mumkin. Mustaqil oʻqish uchun tavsiya etilgan badiiy asarlarni www.aim.uz sayti orqali yuklab olishingiz mumkin.

 


 

Abituriyentlar uchun qoʻshimcha yangiliklar

2018 yil 10 yanvarda Oʻzbekiston Respublikasi Vazirlar Mahkamasining “Oʻzbekiston Respublikasida Oʻlcham birliklarini qoʻllash toʻgʻrisida”gi 21-sonli qarori tasdiqlangan.

Ushbu qarorga muvofiq respublikamizda qoʻllashga ruxsat berilgan Xalqaro oʻlchamlar tizimi (SI)dagi oʻlcham birliklari nomi va belgilanishini oʻquv, oʻquv-metodik va turli maʼlumotlar beradigan yordamchi adabiyotlarda qoʻllash nazarda tutilgan.

Mazkur qaror ijrosini taʼminlash maqsadida joriy yilda oliy taʼlim muassasalari bakalavriatiga qabul test topshiriqlari bazasini shakllantirish jarayonida qoʻllaniladigan oʻlcham birliklari qarorga muvofiq berilishini maʼlum qilamiz.

Masalan: uzunlik oʻlchov birligi santimetr (sm) yangi talabga muvofiq lotin alifbosida cm deb belgilanadi.

 


 

Test topshiriqlaridagi yangiliklar

Umumtaʼlim fanlaridan test topshiriqlarini tuzishga asos boʻlib xizmat qiladigan oʻquv dasturlarida oʻquvchilar tomonidan egallanishi kerak boʻlgan bilim, koʻnikma va malaka talablarida darslik, qoʻllanma, xarita, tarixiy hujjat matni ustida hamda koʻrgazmali qurollar bilan mustaqil ishlay olish nazarda tutilgan.

Mazkur talablardan kelib chiqqan holda 2019 yil oliy taʼlim muassasalari bakalavriatiga qabul test sinovi jarayonida umumtaʼlim fanlaridagi test topshiriqlarida rasm va xaritalar yordamida ishlanadigan test topshiriqlari keng qoʻllanishini maʼlum qilamiz.

Jumladan, tarix fanidan taʼlimning boshqaruv organlari tomonidan foydalanishga tavsiya etilgan atlaslar va yozuvsiz xaritalar asosida tuzilgan test topshiriqlari qoʻllaniladi.

 


 

Abituriyentlar diqqatiga!

2019/2020 oʻquv yilida oliy taʼlim muassasalariga kirish test sinovlarini topshiradigan abituriyentlar tomonidan qabul test sinovlariga tayyorgarlik koʻrish uchun qaysi darsliklardan foydalanish zarurligi haqida koʻplab savollar tushmoqda.

Ushbu savol boʻyicha quyidagilarni maʼlum qilamiz:

  1. 2019/2020 oʻquv yili oliy taʼlim muassasalari bakalavriatiga kirish qabul test sinovlariga tayyorgarlik koʻrish uchun taʼlimni boshqarish boʻyicha vakolatli davlat organlari tomonidan tavsiya etilgan darsliklardan foydalanish mumkin (roʻyxat DTMning saytida eʼlon qilingan).
  2. Test topshiriqlari amaldagi tartibga binoan (Oʻzbekiston Respublikasi Vazirlar Mahkamasining 2018 yil 3 apreldagi 261-sonli qarorining 8-bandi) “umumiy oʻrta va oʻrta maxsus, kasb-hunar taʼlimining umumtaʼlim fanlari oʻquv dasturlariga muvofiq tuziladi”.
  3. Joriy yilda test sinovlariga tayyorgarlik koʻrishda foydalanishga tavsiya etilgan darsliklar bilan birgalikda oʻquv dasturlarida oʻrganish nazarda tutilgan ayrim badiiy adabiyotlar keltirilgan. Test topshiriqlari ham ushbu badiiy adabiyotlardan tuziladi, mazkur adabiyotlarni toʻliq oʻqib chiqish tavsiya etiladi (DTMning saytida darsliklar roʻyxatining past qismida izoh berilgan).
  4. Qaysi darsliklardan foydalanish xususida:
    Quyidagi turdagi darsliklar mavjud:
  • Akademik litsey va kasb-hunar kollejlari uchun tavsiya etilgan darsliklar;
  • 10-sinf va oʻrta maxsus, kasb-hunar taʼlimi taʼlimi muassasalari oʻquvchilari uchun tavsiya etilgan darsliklar, 11-sinf va oʻrta maxsus, kasb-hunar taʼlimi muassasalari oʻquvchilari uchun tavsiya etilgan darsliklar.

Boʻlajak abituriyentlar oʻzi oʻqiydigan (yoki bitirgan) taʼlim muassasasi uchun tavsiya etilgan darsliklarni oʻqish zarur, boshqa taʼlim turi yoki taʼlim muassasalari uchun tavsiya etilgan darsliklarni oʻqish talab etilmaydi.
Test topshiriqlari tegishli taʼlim muassasalari uchun tavsiya etilgan oʻquv dasturlari asosida tuziladi. Abituriyentlar uchun savollar kitobini shakllantirishda ular bitirgan taʼlim muassasa turi, ushbu turdagi taʼlim muassasalarida foydalanishga tavsiya etilgan darsliklar inobatga olinadi.
 

2019-2020 oʻquv yiliga oʻtkaziladigan qabul test sinovi uchun test topshiriqlari tuziladigan darsliklar roʻyxati