Самарқанд давлат университетига Буюк Британиянинг Кардифф университети делегацияси ташриф буюрди. СамДУ халқаро ҳамкорлик бошқармаси бошлиғи Мухтор Носиров билан ўтказилган учрашувда икки университет ўртасида академик ҳамкорликни йўлга қўйиш ва мавжуд алоқаларни кучайтириш масалалари муҳокама этилди.

    - Самарқандга ташриф буюришнинг ўзиёқ биз учун катта шараф бўлди, - дейди Кардифф университети биринчи проректори, профессор Урфан Халик. - Бу қадимий шаҳарнинг ўзига яраша тарихи ва таълим тизими бор. Самарқанд давлат университетининг кўҳна шаҳар маданий меросида ўрни жуда катта деб ўйлайман. Университет Шарқнинг энг қадимий таълим муассасаларидан бири ҳисобланади. Биз СамДУ билан биргаликда, асосан, тарих, иқтисодиёт ва бизнес каби таълим йўналишларида ўзаро ҳамкорлик ўрнатиш ниятидамиз. Сизда жуда кўплаб тарихий обидалар ва сақланиб қолган урф-одатлар мавжуд бўлиб, бу тарихчиларимизнинг ҳамкорликда ишлаши учун жуда қулай. Шунингдек, СамДУ Ўзбекистоннинг тезлик билан ривожланаётган университетларидан бири эканлигини ҳисобга оладиган бўлсак, биз сизлар билан ҳамкорлик қилишдан жуда ҳам мамнунмиз.

    Учрашув доирасида ҳамкорликнинг ўзаро рамзи сифатида икки университет вакиллари эсдалик совғалари алмашдилар. Шундан сўнг, Кардифф университети вакиллари Самарқанд давлат университети Археология ва Зоология музейининг ноёб топилма ва экспонатлари билан танишди.

    Маълумот учун, Кардифф университети 1883 йилда ташкил этилган. "QS World University Rankings 2022" рейтингида 150-ўринда. Буюк Британиянинг Топ-20 университетлари қаторида.

Самарқанд давлат университети

Ахборот хизмати.

Шавкат Акрамов олган суратлар.