“Яратилган шароитларни кўриб, фарзандимга ҳавас қилдим”…

Самарқанд давлат университети юридик, интеллектуал тизимлар ва компьютер технологиялари факультети 1-2-3-курс талабалари ва уларнинг ота-оналари учун учрашув бўлиб ўтди.

Ота-оналар фарзандлари ўқиётган факультетларда бўлишди. Ўқув жараёнлари, лабораториялар, кутубхона, музейлар фаолияти билан танишди. Маърузалар зали, ошхона ва ётоқхоналардаги шароитларни кўздан кечирди.

Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов ғояси асосида яратилган фильм ота-оналар эътиборига ҳавола қилинди. Фильмда оддий оиладан чиқиб, билим олиш орқали юқори натижаларга эришган қаҳрамонларнинг ҳаёт йўли акс эттирилган.

Фильм намойишидан сўнг Самарқанд давлат университети ректори Рустам Холмуродов ота-оналар билан мулоқот қилиб, ота-онанинг фарзанд тарбиясидаги роли, чет тилларини ўрганишнинг аҳамияти, талабаларга яратилган шароитлар ҳақида алоҳида тўхталди.

- Мен ҳам Самарқанд давлат университети география ва экология факультетини битирганман. Неварам Зарифа интеллектуал тизимлар ва компьютер технологиялари факультетида ўқийди, - дейди Бобур Тўхтамуродов. – Узоқ йиллар мактабда ишладим. Неварам ҳам менга ўхшаб ўқитувчи бўлмоқчи, бундан хурсандман. Ота-оналар йиғилиши биз учун манфаатли бўлди. Фарзандларимизнинг ўқиши университет учун эмас, балки биз учун муҳимроқ. Давлат болаларимизнинг ўқиши учун барча имкониятларни яратиб берган.

- Ўғлим Озод дастурлаш соҳасига қизиққани учун СамДУ интеллектуал тизимлар ва компьютер технологиялари факультетига ўқишга кирганди. Бугун факультетда яратилган шароитларни кўриб, фарзандимга ҳавас қилдим, - дейди Жонибек Комилов. - Замонавий, шинам хоналар, ИТ марказини кўриб қувондим. Бугунги учрашув ота-оналар учун манфаатли бўлди. Фильм қаҳрамонларидан бири ҳиндистонлик Синдар Пучаининг ҳаётини кўриб, унинг отасига қойил қолдим. Биз мана шундай оталардан ўрнак олсак арзийди. Болаларимизнинг янада яхшироқ ўқиши учун биз университет билан ҳамкорлик қилишимиз керак.