2022 йил, 30 март. Самарқанд давлат университети ректори, профессор, Олий Мажлис Сенати аъзоси Рустам Холмуродов Самарқанд шаҳридаги Президент мактабига ташриф буюриб, ўқувчилар билан учрашув ўтказган эди. Мазкур ташриф доирасида Самарқанд давлат университети ва Самарқанд шаҳридаги Президент мактаби ўртасида ўқув-услубий, илмий ҳамкорлик алоқалари йўлга қўйилиши юзасидан келишувга эришилганди.  Шунингдек, университетнинг физика, кимё лабораторияларида ўқувчилар учун маҳорат дарслари ташкил этилиши белгиланган эди.

    2022 йил, 19 май. Бугун мазкур келишув доирасида Самарқанд давлат университетига Самарқанд шаҳридаги Президент мактаби ўқувчилари ташриф буюрди. Ўқувчилар дастлаб Самарқанд давлат университетида жойлашган Ёшлар технопаркида бўлиб, технопарк фаолияти билан яқиндан танишди. Шундан кейин улар физика факультети ўқув ва илмий лабораториялари ҳамда дарс жараёнларини ўрганиш мақсадида оптика, электр ва магнитизм ҳамда қаттиқ жисмлар электр ва магнит хоссаларини ўлчаш илмий  лабораторияларида бўлиб, уларнинг фаолияти ҳақида атрофлича маълумот олди.

    – Мен аниқ фанлар йўналишида ўқийман - дейди 10-синф ўқувчиси Дилрабо Орзиқулова. - Самарқанд давлат университети физика факультети илмий фаолияти ва лабораториялари мени жуда қизиқтирарди. Бугунги ташрифда ўзим учун фойдали бўлган кўплаб янгиликларга эга бўлдим. Университет ўқитувчиларидан юқори илмий аниқликдаги таҳлиллар олишга мўлжалланган янги турдаги лаборатория жиҳозларидан фойдаланиш бўйича керакли маълумотлар олдик. Айниқса қаттиқ жисмларнинг электр ва магнит хоссаларини ўлчаш илмий лабораторияси менда катта таассурот қолдирди.

    – Самарқанд давлат университетида жойлашган Ёшлар технопарки менга жуда маъқул бўлди, - дейди 10-синф ўқувчиси Асилбек Тошбоев. - Бу ерда компьютер саводхонлиги, мобиль дастурлаш, лего миндсторм, график ва веб-дизайн, робототехника каби йўналишларда дастурчилар тайёрланар экан. Бизнинг мактабимизда ҳам лего миндстром ва робототехника бўйича машғулотлар йўлга қўйилган. Бу ердаги мутахассислар фаолиятини кўриб, улардан кўпгина фойдали маълумотлар олдим.

 

Ирода Бекмуродова,

Самарқанд давлат университети

Ахборот хизмати ходими.

Шавкат Акрамов олган суратлар.