Samarqand shahridagi Prezident maktabi o‘quvchilari Samarqand davlat universitetida...

2022-yil, 30-mart. Samarqand davlat universiteti rektori, professor, Oliy Majlis Senati a’zosi Rustam Xolmurodov Samarqand shahridagi Prezident maktabiga tashrif buyurib, o‘quvchilar bilan uchrashuv o‘tkazgan edi. Mazkur tashrif doirasida Samarqand davlat universiteti va Samarqand shahridagi Prezident maktabi o‘rtasida o‘quv-uslubiy, ilmiy hamkorlik aloqalari yo‘lga qo‘yilishi yuzasidan kelishuvga erishilgandi. Shuningdek, universitetning fizika, kimyo laboratoriyalarida o‘quvchilar uchun mahorat darslari tashkil etilishi belgilangan edi.

2022-yil, 19-may. Bugun mazkur kelishuv doirasida Samarqand davlat universitetiga Samarqand shahridagi Prezident maktabi o‘quvchilari tashrif buyurdi. O‘quvchilar dastlab Samarqand davlat universitetida joylashgan Yoshlar texnoparkida bo‘lib, texnopark faoliyati bilan yaqindan tanishdi. Shundan keyin ular fizika fakulteti o‘quv va ilmiy laboratoriyalari hamda dars jarayonlarini o‘rganish maqsadida optika, elektr va magnitizm hamda qattiq jismlar elektr va magnit xossalarini o‘lchash ilmiy laboratoriyalarida bo‘lib, ularning faoliyati haqida atroflicha ma’lumot oldi.

– Men aniq fanlar yo‘nalishida o‘qiyman - deydi 10-sinf o‘quvchisi Dilrabo Orziqulova. - Samarqand davlat universiteti fizika fakulteti ilmiy faoliyati va laboratoriyalari meni juda qiziqtirardi. Bugungi tashrifda o‘zim uchun foydali bo‘lgan ko‘plab yangiliklarga ega bo‘ldim. Universitet o‘qituvchilaridan yuqori ilmiy aniqlikdagi tahlillar olishga mo‘ljallangan yangi turdagi laboratoriya jihozlaridan foydalanish bo‘yicha kerakli ma’lumotlar oldik. Ayniqsa qattiq jismlarning elektr va magnit xossalarini o‘lchash ilmiy laboratoriyasi menda katta taassurot qoldirdi.

– Samarqand davlat universitetida joylashgan Yoshlar texnoparki menga juda ma’qul bo‘ldi, - deydi 10-sinf o‘quvchisi Asilbek Toshboev. - Bu yerda kompyuter savodxonligi, mobil dasturlash, lego mindstorm, grafik va web-dizayn, robototexnika kabi yo‘nalishlarda dasturchilar tayyorlanar ekan. Bizning maktabimizda ham lego mindstrom va robototexnika bo‘yicha mashg‘ulotlar yo‘lga qo‘yilgan. Bu yerdagi mutaxassislar faoliyatini ko‘rib, ulardan ko‘pgina foydali ma’lumotlar oldim.