Самарқанд давлат университетига Эрон математика жамияти президенти, Машҳаддаги Фирдавсий университети профессори, Муҳаммад Сал Мослеҳян ташриф буюрди.

    Математика факультети профессор-ўқитувчилари, тадқиқотчи ва талабалари билан бўлиб ўтган учрашувда эронлик профессор бугун дунё илм-фани, хусусан, математик анализ соҳасида амалга оширилаётган илмий тадқиқотлар, бу борада Эронда олиб борилаётган ишлар хусусида тўхталди.  

    -Ўзининг гўзал тарихи билан бутун дунёда машҳур кўҳна Самарқанд шаҳрига биринчи келишим, - дейди профессор Муҳаммад Сал Мослеҳян, - Қадимий шаҳарнинг қадимий олий таълим муассасаси Самарқанд давлат университети менда жуда катта таассурот қолдирди. 35 йилдан буён математик анализ соҳасида илмий тадқиқотлар олиб бориш билан бир қаторда талабаларга дарс бериб келаман. Бугун самарқандлик талабаларнинг кўзларида илм-фанга, математикага бўлган қизиқишни кўриб қувондим. Фаолиятим давомида Эрон математика жамиятига тегишли бир нечта илмий журналларда бош муҳаррир сифатида таҳрир жараёнларида иштирок этаман. Ушбу журналларга қабул қилинаётган ўзбекистонлик олимлар ва тадқиқотчиларнинг илмий мақолаларини кузатиб, шуни айтишим мумкинки, улар томонидан тақдим этилаётган тадқиқот натижалари юқори илмий аниқликка эга. Бугунги ташриф давомида Самарқанд давлат университетида математик анализ соҳасида долзарб бўлган мавзу ва масалаларда илмий тадқиқотлар олиб борилаётганига гувоҳ бўлдим. Ўйлайманки, Самарқанд давлат университети ва Фирдавсий университетлари ўртасида йўлга қўйилаётган дўстона алоқалар бундан кейин ҳам самарали давом этади.

    -Бугунги учрашув биз учун ниҳоятда фойдали бўлди, - дейди математика факультети магистри Давлат Камолиддинов, - Тарихдан маълумки, Машҳад қадим замонлардан бери дунёнинг етакчи илм-фан ва маданият марказларидан бири бўлиб келган. Эроннинг энг йирик қадимий кутубхона ва мадрасалари айнан мана шу шаҳарда жойлашган. Бугун ушбу тарихий илмий мактабнинг замонавий намояндаларидан бири Муҳаммад Сал Мослеҳян билан учрашдик. Учрашув ва суҳбатларда талаба ва ёш тадқиқотчилар учун муҳим бўлган масалаларда маълумотлар берилди, фикрлар алмашилди...

    Учрашув давомида талабалар мавзуга оид ўзларини қизиқтирган саволларга жавоб олдилар. Эронлик профессор чет элда илмий тадқиқот олиб бориш ҳамда магистратура ва докторантура йўналишларида ўқишни истаган талабаларга ўзининг тавсияларини берди.

Самарқанд давлат университети
Ахборот хизмати.
Шавкат Акрамов олган суратлар