Самарқанд вилояти ИИБ ЖХХ Йўл ҳаракати хавфсизлиги бошқармаси Ахборот хизмати раҳбари Хуршид Сафаров, инспекторлар Бобур Ахроров ва Акром Норбоевлар СамДУ талабалари билан очиқ мулоқот ўтказди.

    Учрашувда автоҳалокатларнинг олдини олиш, пиёданинг мажбуриятлари, йўлда ҳаракатланиш қоидалари бўйича сўз юритилди. Шунингдек, Университет хиёбони жойлашган “Алишер Навоий” маҳалласидаги йўл ҳаракати хавфсизлиги учун масъул ЙПХ ходими таништирилди.

    Тадбир савол-жавобга бой бўлиб, қизғин тарзда давом этди.

    - Тарғибот тадбирларимиздан асосий мақсад йўл ҳаракатида содир бўладиган нохуш ҳолатларни олдини олиш, - дейди Хуршид Сафаров. – Пиёда ёки ҳайдовчи ким? Бу биз, сиз ёки тенгдошларингиз. Афсуски, йўл ҳаракатида лоқайдлигимиз сабаб йўл транспорт ҳалокатлари сони ортмоқда. Автоҳалокатларнинг аксарият қисмини сизга ўхшаган ёшлар ташкил қилмоқда. Йўл ҳаракатида хавфсизлик учун фақат йўл патруль хизмати ходимлари эмас, балки барчамиз бирдек масъул бўлишимиз керак. Агар сиз йўл қоидасини бузмасангиз бир ноҳушликни олдини олган бўласиз. Жамиятга қайсидир маънода фойдангиз теккан бўлади. Ён-атрофингиздаги одамларни ҳам йўл ҳаракати қоидасининг бузишига йўл қўйманг….

Самарқанд давлат университети

Ахборот хизмати,

Шавкат АКРАМОВ олган суратлар.