Самарқанд давлат университети мактабгача ва бошланғич таълим факультети талабаси Моҳигул Эркинова университетнинг иқтидорли талабаларидан. Интилувчанлиги, бетакрор ҳунари ва тиришқоқлиги ортидан ҳаётда ва ўқиш жараёнида бир қатор муваффақиятларга эришган. Моҳигул бўш вақтида изалондан гул ясаш билан шуғулланади. Ўтган йилда “Ҳунарманд  аёл” республика кўрик-тановида фаол иштирок этиб совриндор бўлган. Шунингдек, республика бўйича ўтказилган “Хотин-қизларнинг энг яхши стартап лойиҳаси” танловининг якуний босқичида “Ноанъанавий тадбиркорлик йўналиши бўйича энг яхши стартап лойиҳа” номинацияси ғолиблигини қўлга киритган. Яқинда “Ҳудуднинг 100 нафар ихтирочи аёли” ҳафталигида Самарқанд давлат университетидан қатнашган 15 нафар иштирокчидан бири сифатида ўз лойиҳаси билан муваффақиятли иштирок этди.

    -Ҳунар инсонни ҳамиша юксак ва хайрли манзилларга етаклаши рост, - дейди Моҳигул Эркинова. - Шу кунга қадар озми-кўпми нимагадир эришган бўлсам ҳаммаси ҳунарим туфайли бўлди. Уч йилдан буён ҳунармандчилик билан шуғулланаман. Асосан изалон ва мергамент материалларидан совға, уй безаклари ва чироқ сифатида фойдаланиладиган гуллар, турли эсдалик буюмлари ясаш билан шуғулланаман. Бугунги кунда ушбу ҳунарим яхши даромад манбаига айланган. Бир кунда ҳажмига қараб 2тагача гул ясаш мумкин. Ойлик даромадим ўртача 1 миллион сўм. “Ҳудуднинг 100 нафар ихтирочи аёли” ҳафталиги мен учун жуда фойдали бўлди. Ўрганган нарсаларим орқали эндиликдаги фаолиятимда янада юксак марраларга эришишимга ишонаман.

Самарқанд давлат университети

Ахборот хизмати