Самарқанд давлат университетида “Ўзбекистон-Франция маданий ҳамкорлиги” мавзусида семинар бўлиб ўтди. Унда Самарқанд давлат университетига Франциядан ташриф буюрган тадқиқотчи ва олимлар, университет профессор-ўқитувчилари ва талабалар иштирок этди.

    Семинарни Самарқанд давлат университети халқаро ҳамкорлик бўйича проректори Акмал Ахатов кириш сўз билан очди. Шундан сўнг Ўзбекистон-Франция ҳамкорлик алоқалари ҳақида тақдимот намойиш этилди.

    Семинарда “Ўзбекистон йўллар кесишувида” мавзусида илмий тадқиқот олиб борган INALCO - Франция Шарқ тиллари ва ривожланиш миллий институти профессори Катерин Пужол ўз маърузаси билан иштирок этди. Шунингдек, Франциянинг Ангулем университети тадқиқотчиси Элоиз Буателло “Буюк Ипак йўли Лувр музейида” мавзусида тақдимот қилди. Тақдимотда Лувр музейи ташкил топиш тарихи, бугунги фаолияти ҳамда музей намуналари ҳақида атролича маълумот берилди.

    -Самарқанд давлат университети дунё бўйича юқори нуфузга эга бўлган университет, - дейди Ангулем университети тадқиқотчиси Элоиз Буателло, - СамДУ ва Ангулем университетлари ўртасида йўлга қўйилган илмий-академик алмашинув дастури доирасида айни кунларда Самарқанд давлат университетида тадқиқот олиб боряпман. Мазкур семинар Ўзбекистон Президенти Шавкат Мирзиёевнинг Францияга ташрифи кунларига тўғри келгани айни муддао бўлди. Икки давлат ўртасидаги дўстона ҳамкорлик сиёсий-иқтисодий соҳалар билан биргаликда ижтимоий-маданий йўналишларда ҳам устувор йўлга қўйилган. Семинарнинг “Ўзбекистон-Франция маданий ҳамкорлиги” деб номланишига ҳам сабаб шу. Семинарда Лувр музейидаги Буюк Ипак йўли тарихига оид намуналар ҳақида батафсил маълумот беришга ҳаракат қилдим. Ўйлайманки, Ангулем университети ва Самарқанд давлат университети ўртасидаги ҳамкорлик алоқалари бундан кейин ҳам самарали давом этади.

Самарқанд давлат университети
Ахборот хизмати.
Шавкат Акрамов олган суратлар.