Самарқанд давлат университети Агробиотехнологиялар ва озиқ-овқат хавфсизлиги институтининг ҳимояланган ер мева-сабзавотчилиги таълим йўналишидаги икки нафар магистрант диссертация ишларини ҳимоя қилди.

    Ушбу магистрантлар 2020 йил январь ойида ўқишга қабул қилиниб, икки йил давомида илмий изланишлар олиб борди. Тадқиқотчиларнинг ишланмалари муваффақиятли ҳимоя қилиниб, комиссия аъзолари томонидан муносиб баҳоланди.

    Агрокимё кафедраси профессори Давлат Нормуродов илмий раҳбарлигида тадқиқот олиб борган магистрант Жавоҳир Эргашевнинг “Ҳимояланган ерларда помидорнинг гетрозисли дурагайларни ўстириш хусусиятлари” мавзусидаги бажарган ишлари дала шароитида ва назарий билимларга асосланган бўлиб, профессор-ўқитувчилар томонидан алоҳида эътироф этилди.

    Шунингдек, профессор Собир Санаев илмий раҳбарлигида магистрант Музаффар Розиқовнинг дунё бозорига энди кириб келаётган, қимматбаҳо ва шифобахш - порей пиёзи бўйича олиб борган изланишлари жуда муҳим аҳамиятга эга эканлиги таъкидланди.

    - “Ҳимояланган ерларда порей пиёзи кўчатини етиштириш усулларининг ўсиши, ривожланиши ва ҳосилдорлигига таъсири” мавзусида изланишлар олиб бордим, - дейди магистрант Музаффар Розиқов. – Икки йил давомида амалиёт билан назарияни бирлаштирган ҳолда бир қатор натижаларга эришдим. Тадқиқотнинг асосий мақсади ҳимояланган ерларда порей пиёзининг турли дурагайларини кўчатини сочма ва квадратлаб етиштириш усуллари ўрганишдир. Шунингдек, ўсув даврида баргдан озиқлантиришнинг ўсиши, ривожланиши, ҳосилдорлигига ва ҳосил сифатига таъсирини баҳолашдан иборат. Тадқиқотнинг янгилиги эса, илк бор Самарқанд вилояти Оқдарё туманидаги ахборот маслаҳат маркази ва фермер хўжалиги шароитида  порей пиёзининг Линколин Ф1 ва истиқболли  Сизокрлий (Болгарский) Ф1 каби дурагайлар уруғлари  плёнкали  иссиқхоналарда тоза сув, Сила кремния ва  Наноплант эритмасида ивитилиб, сочма ва квадратлаб экиш усулида кўчат олиш учун экиб ўрганилди. Сўнгра ушбу етиштирлган порей пиёзи кўчатлари турли ўсишни бошқарувчи воситалар билан баргдан озиқлантирилиб мазкур дурагайларнинг ўсиши, ривожланиши ва ҳосилдорлиги ўрганилиб, юқори сифатли ҳосилли дурагайларни етиштириш илмий асосланди. Порей пиёзи дурагайларини плёнкали иссиқхоналарда турли ўстириш усулларида етиштиришнинг иқтисодий самарадорлиги ҳисобланди ва ишлаб чиқаришга тавсиялар берилди…

Беҳруз Шамсиддинов

Самарқанд давлат университети

Ахборот хизмати ходими,

Шавкат Акрамов олган суратлар.