Самарқанд давлат университети ўқув ишлари бўйича проректори Рустам Йўлдошев биология, психология ва ижтимоий-сиёсий фанлар факультети талабалари билан учрашув ўтказди.

    Биринчи ва иккинчи курс талабалари иштирок этган тадбирда ўқув жараёнлари, кредит модул тизими, чет тилини ўрганиш ва мустақил таълимнинг афзалликлари бўйича сўз юритилди. Шунингдек, таълим тизимида олиб борилаётган ислоҳотларнинг моҳияти тушунтирилди.

    Учрашув расмиятчиликдан холи, очиқ мулоқот тарзида ўтказилиб, талабалар ўзларининг қизиқтирган саволларига жавоб олишди.

    - Таълим олиш, ўқиш ҳар бир талабанинг кундалик эҳтиёжига айланиши лозим. Ўқишда ҳам баҳо учун эмас, илм қилиш учун изланиш зарур, - дейди проректор Рустам Йўлдошев. – Имтиҳон жараёнлари кредит модул тизими асосида олиб борилади. Имтиҳондан ўтолмаган талаба фанни қайта ўзлаштириши учун белгиланган тартиб асосида маълум муддат ўқиши ва бунинг учун тўлов қилиши лозим. Яхши ўқиган, дарсларда фаол қатнашган талаба, ҳеч қачон имтиҳондан йиқилмайди. СамДУ да талабалар билимини баҳолаш бўлими ташкил этилган. Имтиҳон жараёнлари  адолатли ва шаффоф тарзда амалга оширилмоқда. Дарс ўтган ўқитувчига талабанинг якуний назоратини текширишга рухсат берилмайди. Сизнинг натижаларингиз бошқа ўқитувчилар томонидан кимлигингизга қараб эмас, меҳнатингизга қараб баҳоланади… Чет тилларини ўрганиш бугунги давр талабидир. Замон шу даражада ривожланмоқдаки, беш ўн йилдан сўнг учинчи тилни ўрганиш ҳам кун тартибига айланиши ҳеч гап эмас. Сизнинг ота-онангиз ва университетингиз таълим ва тарбия олишингиз учун барча шароитларни яратиб берган. Агар ҳар бир йигит-қиз бундан оқилона фойдаланса жамият учун энг катта фойдаси шу бўлади…

    Самарқанд давлат университети

    Ахборот хизмати,

    Шавкат АКРАМОВ олган суратлар.