Samarqand davlat universiteti o’quv ishlari bo’yicha prorektori Rustam Yo’ldoshev biologiya, psixologiya va ijtimoiy-siyosiy fanlar fakulteti talabalari bilan uchrashuv o’tkazdi.

    Birinchi va ikkinchi kurs talabalari ishtirok etgan tadbirda o’quv jarayonlari, kredit modul tizimi, chet tilini o’rganish va mustaqil ta’limning afzalliklari bo’yicha so’z yuritildi. Shuningdek, ta’lim tizimida olib borilayotgan islohotlarning mohiyati tushuntirildi.

    Uchrashuv rasmiyatchilikdan xoli, ochiq muloqot tarzida o’tkazilib, talabalar o’zlarining qiziqtirgan savollariga javob olishdi.

    - Ta’lim olish, o’qish har bir talabaning kundalik ehtiyojiga aylanishi lozim. O’qishda ham baho uchun emas, ilm qilish uchun izlanish zarur, - deydi prorektor Rustam Yo’ldoshev. – Imtihon jarayonlari kredit modul tizimi asosida olib boriladi. Imtihondan o’tolmagan talaba fanni qayta o’zlashtirishi uchun belgilangan tartib asosida ma’lum muddat o’qishi va buning uchun to’lov qilishi lozim. Yaxshi o’qigan, darslarda faol qatnashgan talaba, hech qachon imtihondan yiqilmaydi. SamDU da talabalar bilimini baholash bo’limi tashkil etilgan. Imtihon jarayonlari  adolatli va shaffof tarzda amalga oshirilmoqda. Dars o’tgan o’qituvchiga talabaning yakuniy nazoratini tekshirishga ruxsat berilmaydi. Sizning natijalaringiz boshqa o’qituvchilar tomonidan kimligingizga qarab emas, mehnatingizga qarab baholanadi… Chet tillarini o’rganish bugungi davr talabidir. Zamon shu darajada rivojlanmoqdaki, besh o’n yildan so’ng uchinchi tilni o’rganish ham kun tartibiga aylanishi hech gap emas. Sizning ota-onangiz va universitetingiz ta’lim va tarbiya olishingiz uchun barcha sharoitlarni yaratib bergan. Agar har bir yigit-qiz bundan oqilona foydalansa jamiyat uchun eng katta foydasi shu bo’ladi… 

    

    Samarqand davlat universiteti

    Axborot xizmati,

    Shavkat AKRAMOV olgan suratlar.