Самарқанд давлат университетига Ҳиндистон Парламентининг юқори палатаси — Раджа Сабҳа раиси ўринбосари Хариванш Нараян бошчилигидаги делегация ташриф буюрди.

    Мартабали меҳмонлар билан Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов учрашди.

    Мулоқотда Ўзбекистон ва Ҳиндистон ўртасидаги дипломатик муносабатлар, таълим, маданият, илм-фан соҳаларидаги ҳамкорликнинг ҳолати ва истиқболлари ҳақида фикр алмашилди.

    Хариванш Нараян Самарқандда яқинда ўтказилган иқлим ўзгаришларига бағишланган халқаро анжуманнинг долзарблигини эътироф этди. Шунингдек, у Ҳиндистон ва Ўзбекистон ўртасидаги дўстона муносабатларни мустаҳкамлаш, олий таълим, фан, саноат, ишлаб чиқариш ва туризм йўналишларида ўзаро манфаатли ҳамкорликни кенгайтириш бўйича таклифларни илгари сурди.

    СамДУ ректори Рустам Холмуродов Ҳиндистоннинг етакчи олий таълим муассасалари билан ҳамкорликни мустаҳкамлаш, профессор-ўқитувчилар, тадқиқотчилар ва талабалар алмашинуви, қўшма илмий тадқиқотлар олиб бориш ҳамда малакали кадрлар тайёрлаш борасидаги алоқаларни йўлга қўйиш томонлар учун манфаатли эканини таъкидлади.

    Учрашув давомида таълим тизимидаги сўнгги ўзгаришлар, олий таълим муассасалари ўртасидаги ҳамкорлик истиқболлари ҳамда бу борадаги стратегик ёндашувлар муҳокама қилинди.