Вазирлар Маҳкамаси “Ўзбекистон Республикаси Президентининг соврини учун “Рақамли технологиялар йўналишида энг яхши стартап” (President Tech Award) танловини ўтказиш тартиби тўғрисида” қарор қабул қилди.

    Унга кўра ёшларнинг ахборот-коммуникация технологиялари соҳасидаги стартап лойиҳаларни қўллаб-қувватлаш мақсадида умумий мукофот жамғармаси 1 миллион АҚШ доллари бўлган Президент соврини учун танлов ўтказилади.

    Ушбу танлов:

    соҳа ва тармоқлар ривожи учун хизмат қиладиган, ёшлар томонидан илгари сурилган илғор бизнес-ғоялар ва истиқболли стартап лойиҳаларни саралаш тизимини яратиш; 

    экспортга йўналтирилган ва жаҳон IT-бозорига мўлжалланган дастурий маҳсулотлар яратилишини қўшимча рағбатлантириш;

    иқтидорли ёш дастурчилар тажрибаси ва уларнинг жамоада ишлаш кўникмасини ошириш; 

    ёшларнинг ахборот-коммуникация технологиялари соҳасига бўлган қизиқишини янада кучайтиришга замин яратади.

    Танлов 2023 йил май ойидан бошлаб 5 та асосий ва 1 та махсус йўналиш бўйича ўтказилади. 

    Аризаларни қабул қилиш, иштирокчиларни рўйхатдан ўтказиш, танловни ёритиш ва танлов ўтказилиши билан боғлиқ бошқа тадбирлар махсус портал орқали IT-парк дирекцияси томонидан амалга оширилади.

    Ғолиблар Марказий банкнинг тўлов амалга ошириладиган кундаги расмий курси бўйича миллий валюта эквивалентида бир марталик пул мукофотлари билан тақдирланади: 

    а) танловнинг 5 та асосий йўналишлари бўйича: 

    1- ўрин учун - 100 000 АҚШ доллари; 

    2- ўрин учун - 50 000 АҚШ доллари; 

    3- ўрин учун - 30 000 AҚШ доллари; 

    б) танловнинг махсус йўналиши бўйича (битта) - 100 000 АҚШ доллари. 

    Рақамли технологиялар вазирлиги 2023 йил 1 майга қадар танлов иштирокчиларини рўйхатга олиш ва янгиликларни ёритиб боришга ихтисослаштирилган махсус портал ишга туширилишини таъминлайди.

    Танлов ҳар йили ўтказилади. 

Манба