Samarqand davlat universitetiga Hindiston Parlamentining yuqori palatasi — Rajya Sabha raisi o‘rinbosari Harivansh Narayan boshchiligidagi delegatsiya tashrif buyurdi.

    Martabali mehmonlar bilan Samarqand davlat universiteti rektori, O‘zbekiston Respublikasi fan arbobi, Oliy Majlis Senati a’zosi Rustam Xolmurodov uchrashdi.

    Muloqotda O‘zbekiston va Hindiston o‘rtasidagi diplomatik munosabatlar, ta’lim, madaniyat, ilm-fan sohalaridagi hamkorlikning holati va istiqbollari haqida fikr almashdilar.

    Harivansh Narayan Samarqandda yaqinda o‘tkazilgan iqlim o‘zgarishlariga bag‘ishlangan xalqaro anjumanning dolzarbligini e’tirof etdi. Shuningdek, u Hindiston va O‘zbekiston o‘rtasidagi do‘stona munosabatlarni mustahkamlash, oliy ta’lim, fan, sanoat, ishlab chiqarish va turizm yo‘nalishlarida o‘zaro manfaatli hamkorlikni kengaytirish bo‘yicha takliflarni ilgari surdi.

    SamDU rektori Rustam Xolmurodov Hindistonning yetakchi oliy ta’lim muassasalari bilan hamkorlikni mustahkamlash, professor-o‘qituvchilar, tadqiqotchilar va talabalar almashinuvi, qo‘shma ilmiy tadqiqotlar olib borish, hamda malakali kadrlar tayyorlash borasidagi aloqalarni yo‘lga qo‘yish tomonlar uchun ham manfaatli ekanini ta’kidladi.

    Uchrashuv davomida ta’lim tizimidagi so‘nggi o‘zgarishlar, oliy ta’lim muassasalari o‘rtasidagi hamkorlik istiqbollari hamda bu boradagi strategik yondashuvlar muhokama qilindi.