Самарқанд давлат университетининг интеллектуал тизимлар ва компьютер технологиялари факультети дастурий инжинеринг кафедраси профессори Чристо Анантҳ хорижлик олимлар билан ҳамкорликда “Сунъий интеллектга асосланган адаптив шовқинни камайтириш тизими”ни яратгани учун Германиянинг ихтиро патентига эга бўлди.

    Мазкур ихтиро сунъий интеллект бошқарувидаги адаптив тизим бўлиб, у турли муҳандислик иловаларида реал вақтда шовқин аралашувини камайтиришга мўлжалланган. Тизим машинани ўрганишнинг илғор алгоритмлари – чуқур нейрон тармоқлари ва мустаҳкамлашга асосланган ўрганиш технологияларидан фойдаланган ҳолда ишлайди. У шовқин манбаларини доимий кузатиб боради ва сигнал сифатини оптималлаштириш учун параметрларини автоматик равишда мослаштиради.
    
    Мазкур инновацион ечим телекоммуникация, сенсор тармоқлари ва саноат автоматизацияси каби соҳаларда самарали қўлланилиши мумкин. Тизим бир нечта шовқин манбаларига қарши юқори бардошлиликни намойиш этиб, сигналларни қайта ишлаш ҳамда алоқа сифатини сезиларли даражада яхшилайди.

    Бу технология муҳандислик тизимларига ташқи шовқин ва бошқа нохуш омилларнинг таъсирини камайтириб, аниқ ва барқарор алоқа таъминлаш имконини беради.