Samarqand davlat universitetiga Malayziyaning MARA Texnologiya universiteti delegatsiyasi tashrif buyurdi. Mehmonlarni SamDU Xalqaro hamkorlik bo’yicha prorektori Akmal Axatov qabul qildi.

    Tashrifdan asosiy maqsad 2020-yil avgust oyida imzolangan hamkorlik to’g’risidagi memorandumni amaliy loyihalar bilan boyitishdir.

    Shuningdek, professor-o’qituvchi va talabalar almashinuvini yo’lga qo’yish, SamDU bitiruvchilarini magistratura va doktorantura bosqichi bo’yicha Malayziyaga o’qishga yuborish masalalari muhokama etildi.  SamDU tadqiqotchilariga MARA Texnologiya universitetining professor-o’qituvchilarini, shuningdek malayziyaliklarga samarqandlik olimlarni ilmiy rahbar sifatida tayinlash va onlayn darslar o’tishga kelishib olindi. Scopus bazasiga kiruvchi jurnallarda ilmiy maqolalar tayyorlash bo’yicha fikrlar almashildi.

    - Samarqand tarixiy va maftunkor shahar. Delegatsiyamizning har bir a’zosida chuqur iz qoldirdi. Bu yerga kelishni orzu qilardim, - deydi MARA Texnologiya universiteti matematika fakulteti dekani, professor Haryani Haron. - Samarqand va Malayziya o’rtasidagi aloqalar sabab niyatimga erishdim. Ikkala universitetimiz hamkorligi yanada yuqori pog’onaga chiqishiga ishonaman…

Samarqand davlat universiteti

Axborot xizmati