Samarqand davlat universitetiga Isroilning O‘zbekistondagi elchixonasi vakillari hamda isroillik professor Xaim Koren tashrif buyurdi.

    Uchrashuvdan maqsad yozuvchi Avi Jorishning “Va sen yangilik yaratajaksan” nomli kitobi taqdimotini o‘tkazishdir.

    Marosimda Samarqand davlat universiteti rektori, O‘zbekiston Respublikasi fan arbobi Rustam Xolmurodov hamda Isroilning O‘zbekistondagi Favqulodda va muxtor elchisi Zexavit Ben Xillel Zoom platformasi orqali ishtirok etdi.

    Tomonlar SamDU va Isroilning nufuzli taʼlim muassasalari bilan hamkorligi to‘g‘risida to‘xtalib, bu borada hali qilinishi ko‘p bo‘lgan  ishlarni alohida taʼkidladilar. Shuningdek, yozuvchi Avi Jorishning “Va sen yangilik yaratajaksan” nomli kitobi haqida fikr-mulohazalarini bildirdilar.

    Tadbir davomida professor Xaim Koren asarning mazmuni va mohiyati haqida batafsil maʼlumot berdi.

    O‘zbekiston Respublikasi Innovatsion rivojlanish vaziri, akademik Ibrohim Abdurahmonov mazkur kitobga yozgan so‘zboshisida alohida ta’kidlaganidek: ushbu kitobda Avi Jorish Isroil dunyodagi innovatsiyalarning eng mashhurlarini to‘plam sifatida taqdim etgan. Unda kichik mamlakatning ilg‘or innovatsion davlatga aylanish yo‘lidagi muvaffaqiyatning asl manbalari yoritilgan. Muallif mamlakat muvaffaqiyatining asosiy omillari bo‘lgan siyosiy institutlar, taʼlim sistemasi, xalqning og‘ir va qiyin damlarda bir-birining hayotini yengillashtirish uchun qatʼiyatli va sabr-toqatli bo‘lganligiga eʼtibor qaratgan.

    Kitobda nafaqat Isroil, balki butun dunyoning qator ulkan muammolarini hal qila olgan 15 taniqli shaxsning tarjimai holi jamlangan. Ushbu novatorlarning har biri nafaqat o‘zi, balki boshqa odamlar uchun ham haqiqiy qiyinchiliklar tug‘dirgan dolzarb muammoga duch kelishgan. Biroq muvaffaqiyatsizlik to‘siqlarga duch kelganda Isroilliklar o‘z yechimlarini taklif qilish hamda ularni amalga oshirishda qatʼiyatli bo‘lganlar.  Ular yaratgan muhim ixtirolar ko‘plab jabhalar, shu jumladan, tibbiyot va tibbiy yordam xizmati, qishloq xo‘jaligi, energetika, harbiy soha va aviatsiya sohalarini tubdan o‘zgartirgan….

Samarqand davlat universiteti

Axborot xizmati,

Shavkat AKRAMOV olgan suratlar.