Агар кайфиятингиз ёмон бўлса, уни яхшилашга ҳаракат қилинг. Бир нуқтада қотиб қолманг. Ўзингизни ўнглашга интилинг, кайфиятингизни кўтаришга сабабчи бўладиган йўлларни ахтаринг. Ахир ўзингиз ҳақингизда ўзингиз қайғурмасангиз, бошқалардан нима кутиш мумкин? Шундай экан ўз устимизда ишлашни ўрганайлик.

Кайфият кўтаришнинг йўллари:

    1.Аввало, ҳар доим сизда яхши кайфият бўлиши учун, ўзингизни бошқаришни ўрганинг. Ҳар нарсага хафа бўлаверманг. Яқинларингиздан араз қилиб ўтириш ярамайди - уларни кечиришни ўрганинг. Кечириш – биринчи ўринда ўз қалбингизни ёмон ҳислардан тозалаш ва ўзингизга руҳий азоб бермасликнинг бир йўли ҳисобланади.

    2.Дунёга кулгу билан қаранг. Хатто энг оғир дамларда ҳам табассум қилинг ва шундай денг: “Бу ҳам ўтиб кетади!” Агар бу гапга чин дилдан ўзингизни ишонтирсангиз, энг ёмон нарса ҳам жуда енгил ўтади.

    3.Куни билан уйда ўтирманг, кўчага чиқинг, ишга боринг. Дўстларингиз орасида бўлинг. Ишонаман, озингизни чалғитсангиз кайфиятингиз ёмон бўлмайди.

    4.Ҳаётингизга янгилик олиб киринг. Психологлар шуни маслаҳат беришадики, вақти-вақти билан ҳаётингиздаги одатланган нарсаларингизни ўзгартириб туринг. Масалан, янги хобби топинг, ёки кийиниш услубингизни, қиёфангизни ўзгартиринг. Гардеробингиздаги кийимларни янгиланг. Ёрқин ранглар танланг. Бундай ўзгаришлар кайфиятингизни кўтарилишига ёрдам беради.

    5.Ўзингизга ҳордиқ беришни ўрганинг. Иш давомида ёки уй ишларида бирор бир вазифани тугатганингизда ўзингизни тақдирланг. “Балли, мен шу ишни уддаладим, бугунги вазифаларимдан бирини бажардим, мен кучлиман” денг ва ёқимли нарсалар ҳақида ўйланг. Масалан, дўстларингиз билан ўтирган завқли оқшомни ёки суюкли ёрингиз билан бирга еган кечки овқат ҳақида эсланг. Ҳидли шамларни тассавур қилинг ва ифорини ҳис қилинг.

    6.Кайфиятни кўтарувчи мевалар истеъмол қилинг: мандарин, апелсин, лимонли чой. Уларнинг таркибида эфир ёғи бўлиб, кайфият кўтарилишида ёрдам беради.

    7.Душ қабул қилинг. Сув танани дам олишида ва ҳордиқ чиқаришида кўмаклашади, ҳаётий активлиги(тонуси)ни оширади ва кайфиятни кўтаради.

    8.Перспектива туйғусини сақлашга ҳаракат қилинг, яъни бу дегани истиқболга ишонинг. Ҳаёт бу об-ҳавога ўхшайди, бугун кунимиз булутли бўлса, эртага қуёш чарақлаб чиқади. Шундай экан, эртанги қуёшли кунга ишонинг.

    9.Агар ётгингиз келса, ухлашни истасангиз – яхшиси, буни қилмаганингиз маъқул. Ётиш – кайфиятингизни бузган нарсалар ҳақида ўйлаш дегани. Ундан кўра, ҳаракатли иш билан шуғулланинг. Ҳаракат қилганингизда сизнинг эмоцияларингиз ҳам ҳаракатга тушади. Шундай экан, кино кўринг, хонангизни тозаланг, бирор бир жисмоний иш билан шуғулланинг. Булар хафагарчиликни унутиб, кайфиятингизни кўтаришда кўмаклашади.

 

Мухтасам Сулаймонов

Самарқанд давлат университети

Психология назарияси ва амалиёти кафедраси ўқитувчиси