Қуёш панеллари долзарб, муҳим, зарурат

Самарқанд давлат университетида мазкур масалага бағишланган семинар ўтказилди…

2023 йил 8 февраль куни Президентимиз Шавкат Мирзиёев Тошкент шаҳрида энергетика ва транспорт инфратузилмасини ривожлантириш, маҳаллаларни обод қилиш ва аҳоли бандлигини ошириш масалалари бўйича ўтказган йиғилишда, қуёш панелларини ўрнатиш ҳам энергетика тизими учун, ҳам оилалар учун манфаатли бўлишини билдирган эди.

Олий таълим, фан ва инновациялар вазири Иброҳим Абдураҳмонов раҳбарлигида ўтказилган онлайн йиғилишда қуёш панеллари олий таълим муассасаси йиллик электр энергия сарфининг камида 70 фоизини қоплаши лозимлигини таъкидлаб, масъулларга тавсиялар берди.

Белгиланган вазифалар ижросини таъминлаш мақсадида Олий таълим, фан ва инновациялар вазирилиги томонидан ишчи гуруҳ тузилиб, олий таълим муассасаларига қуёш панелларининг ўрнатилиши бўйича бир қатор ишлар амалга оширилмоқда.

Самарқанд давлат университетига Тошкент давлат техника университети профессор-ўқитувчиларидан иборат ишчи гуруҳ ташриф буюриб, қуёш электр станцияларини қуриш ҳамда электр энергияни муқобиллаштириш масалалари бўйича семинар ўтказди. Тадбирда вилоятдаги 14 олий таълим муассаса вакиллари иштирок этди. Суҳбат давомида мутахассислар қуёш панелларидан фойданилишда юқори самарадорликни ошириш бўйича ўзаро фикр ва тажриба алмашишди.

- Президентимиз таъкидлаганидек, қуёш панелларидан фойдаланиш, электр энергияни тежаш халқ учун манфаатли бўлади, - дейди СамДУ илмий ишлар ва инновациялар бўйича проректори Ҳаким Хушвақтов. – Ҳақиқатдан ҳам бугунги кунда электр энергиясиз ҳаётни тасаввур қилиш мумкин эмас. Ривожланган давлатлар аллақачон қуёш панеллари орқали кундалик эҳтиёжларини йўлга қўйиб олган. Самарқанд давлат университетида ҳам электр энергия самарадорлигини ошириш ва қуёш панелларидан фойдаланиш бўйича тизимли ишлар амалга оширилган. Ҳозирги кунда 100 кВт.лик қуёш фото электр станцияси ва 2000 литрли қуёш сув иситгичлари ўрнатилган. Келажакда бу кўрсаткични бир неча баробарга оширишни режалаштирганмиз…