Assalomu alaykum!

    Qadrli  do‘stlarim!

 

    Sizlarni kirib kelayotgan yangi 2025-yil bilan samimiy tabriklayman.

    Uzoq umr, sihat-salomatlik, oilangizga tinchlik, xotirjamlik, ro‘zg‘oringizga to‘kinlik, kasbingizga baraka tilayman.

    Yangi yilni kutib olish, eski yilni kuzatib qolish har birimizning zimmamizga ulkan mas’uliyat  yuklaydi.

    Bu avvalo, o‘tayotgan yil sarhisobi, yangi yilning rejalarida namoyon bo‘ladi.

    2024-yil Samarqand davlat universiteti uchun g‘oyatda esda qolarli, mazmunli yil bo‘ldi.

    2024-yilda Prezidentimiz farmoni bilan filologiya fanlari doktori, professor Suyun Karimov “O‘zbekistonda xizmat ko‘rsatgan yoshlar murabbiysi” unvoniga, professor Xurshid Bozorov va magistrant Uljon Amriyevalar "Shuhrat" medaliga sazovor bo‘ldi.

    13  xalqaro anjuman o‘tkazilib, 50 ga yaqin davlatdan 400 dan ziyod olimlar ishtirok etdi.

    14 DSc, 121 PhD dissertatsiya himoyalari bo‘lib o‘tdi.

    37 nafar domlalarimiz dotsent, 18 nafari professor unvoniga ega bo‘ldi.

    145 Scopus, 302 Web of Science ma’lumotlar bazasida indekslanuvchi jurnallarda  professor-o‘qituvchilarimizning maqolalar e’lon qilindi.

    72 monografiya, 50 darslik, 116 o‘quv qo‘llanma nashr etildi.

    2024-yilda «Samarqandim» jurnali va samarqandim.uz veb-saytiga asos solindi.

    500 nafarga yaqin xorijlik talaba Samarqand davlat universitetida tahsil oldi.

    100 nafar xorijlik professor-o‘qituvchi bakalavr va magistlarimizga dars berdi.

    3 nafar yosh olimimiz: Shahboz Hasanov Xitoyda,  Dilshod Hakimov Belorussiyada,  Otabek Umarov Vengriyada PhD dissertatsiyasini himoya qildi.

    5  xalqaro grant qo‘lga kiritildi. 

    7 nafar diplomat -  Italiya, Slovakiya, Hindiston, Bangladesh, Isroil, Qozog‘iston, Tojikiston kabi davlatlarning O‘zbekistondagi Favqulodda va muxtor elchisi Samarqand davlat universitetiga tashrif buyurdi.

    167 nafar professor-o‘qituvchimiz xorijda bo‘ldi.

    2 nafar olimimiz: Normurot Fayzullayev Qozog‘istonning Atirau neft va gaz, Rustam Berdiyev Xitoyning Dechjou universitetlari Faxriy professori unvoniga sazovor bo‘ldi.

    2024-yilda Samarqand davlat universitetida  Mexanika laboratoriyasi, 150 o‘rinli oshxona,  shuningdek, Kattaqo‘rg‘on filialida 4000 o‘rinli o‘quv, 500 o‘rinli talabalar turar-joyi binolari, Urgut filialida  400 o‘rinli talabalar turar-joyi foydalanishga topshirildi.

    8 nafar talaba va bitiruvchi: Davlat Bobonov, Sitora Turdibekova, Sobirjon Safaraliyev, Shahboz Nurmatov, Amirxon Sodiqov, Uljon Amriyeva va Urganchbek Egamnazarov Parij-2024 Olimpiada va  yozgi Paralimpiya o‘yinlarida ishtirok etdi. Navbahor Hamidova Osiyo chempionatida,  Ilhom Parmonov va Sharofiddin Amriddinovlar Jahon chempionatida oltin medalga ega bo‘ldi.

    3 nafar SamDU professor-o‘qituvchisi xalq deputatlar Samarqand viloyat Kengashi deputatligiga saylandi.

    Aziz hamkasblarim!

    2025-yilda marrani yanada baland olamiz. Amalga oshiradigan ishlarimiz ko‘p. Vaqt hech kimni kutib turmaydi.

    Samarqand davlat universitetining xalqaro nufuzini yanada oshirish, ilmiy aloqalarni mustahkamlash, butunlay yangi zamonaviy universitetga aylantirish maqsadimizdan aslo chekinmaymiz. Ortga qaytmaymiz. Bu yo‘lda bir tanu bir jon bo‘lib harakat qilamiz.

    Yangi yil arafasida Sizlarga kuch-qudrat, sog‘lik, mustahkam iroda tilayman.

    Jonajon universitetimiz yildan-yilga rivojlansin, taraqqiy etsin.

    Butun xalqimizning faxr-iftixoriga aylansin.

    Yangi yilingiz muborak bo‘lsin!