Xalqaro anjumanda AQSH ning Dallasdagi Texas universiteti Nanotexnologiya instituti direktori o‘rinbosari, ITMO universiteti gibrid nano fotonika hamda optoelektronika laboratoriyasi mudiri, O‘zbekiston Respublikasi fan arbobi Anvar Zohidov, Rossiya Kvant markazi asoschisi Ruslan Yunusovlar onlayn maʼruzalari bilan qatnashdi.  

Anjumandan maqsad kvant hisoblashning ustuvor ilmiy yo‘nalishlari, tabiatshunoslik fanlari, kvant texnologiyalari sohasidagi bilimlarni zamonaviy ilm-fan yutuqlari bilan integratsiya qilishdir. Tadbir ishtirokchilari tomonidan axborot texnologiyalari, matematika, matematik modellashtirish, kimyo taʼlimi yo‘nalishlaridagi talabalar va maktab o‘quvchilariga dars o‘tish ham ko‘zda tutilgan.

Akmal Axatov, Samarqand davlat universiteti xalqaro hamkorlik bo‘yicha prorektori, professor:

- Samarqand davlat universiteti rektori, O‘zbekiston Respublikasi fan arbobi, Oliy Majlis Senati aʼzosi Rustam Xolmurodov o‘tgan yili Rossiya Kvant markazida bo‘lib, qator kelishuvlarga erishib, O‘zbekistonda rossiyalik olimlar bilan hamkorlikda Kvant haftaligini tashkil etish taklifini ilgari surgan edi. Bugun mazkur loyiha qo‘llab-quvvatlanib, Samarqandda kvant haftaligi bo‘lib o‘tmoqda. Jizzax, Olmaliq, Toshkent shaharlari bo‘ylab anjuman ishtirokchilari maktab o‘quvchilari va talabalarga kvant fizikasiga oid maʼruza, amaliy mashg‘ulot, seminar, viktorinalar o‘tishi rejalashtirgan.

Maksim Ostras Rossiya kvant markazi direktori, professor:

- Samarqand davlat universitetida bo‘lib o‘tayotgan Kvant haftaligi doirasida olimlar bilan kvant mexanikasining asosiy tamoyillari va tushunchalari, zamonaviy fizikada kvant nazariyasining o‘rni, kvant hisoblash va kvant kommunikatsiya texnologiyalari bo‘yicha fikr-mulohazalarimizni o‘rtoqlashdik… Samarqand davlat universitetida Kvant markazi tashkil etilganiga ko‘p vaqt bo‘lmasa-da yuqori natijalarga erishilmoqda. Professor Anvar Zohidov rahbarligida kvant fizikasi bo‘yicha olib borilayotgan ilmiy izlanishlar bizda qiziqish uyg‘otdi. Mazkur markazda tadqiqot olib borayotgan olimlarning 3 ta xalqaro grantidan ham xabarimiz bor. Rossiya kvant markazi va Samarqand kvant markazi o‘rtasidagi hamkorlikni yana-da rivojlantirish uchun bugungi anjuman muhim o‘rin tutadi…

Dmitriy Chermoshentsev, Rossiya Kvant texnologiyalari ichki ilmiy-tadqiqot ishlarini qo‘llab-quvvatlash bo‘yicha loyiha guruhi rahbari:

- O‘zbekistonda ilk bor kvant haftaligi o‘tkazilmoqda. Bugun Samarqandda jahon kvant ilmining yetuk mutaxassislari jam bo‘ldi. Bu bejizga emas. Samarqand davlat universiteti muhandislik, kvant, yadro fizikasi kabi sohalarda Markaziy Osiyoda, jahonda yetakchilik qilmoqda. SamDU da Kvant markazi ham mavjud. Mazkur markazga hamkorimiz, taniqli olim Anvar Zohidovning rahbarlik qilishi bizni quvontiradi…

Tadbirdan so‘ng anjuman ishtirokchilari Samarqand davlat universiteti akademik litseyi, SamDU maktabida bo‘lib, marʼuza va seminarlar o‘tishdi…