Samarqand viloyat axborot-kutubxona markazida o‘zbek mumtoz adabiyotining yirik vakili, davlat va jamoat arbobi Zahiriddin Muhammad Bobur tavalludining 540 yilligiga bag‘ishlab “Kim yor anga ilm tolibi – ilm kerak” mavzusidagi ilmiy-amaliy anjuman o’tkazildi. Tadbirda Samarqand davlat universiteti professor-o’qituvchi va talabalari, shoir va yozuvchilar ishtirok etdi.

    Konferensiyada SamDU filologiya fakulteti olimlari “Zahiriddin Muhammad Boburning qiyoslash uslubi”, “Sharq va g‘arb svilizatsiyasida Bobur ijodining o‘rni”, ““Boburnoma”da Samarqand tasviri” mavzulari bo’yicha ma’ruza qildi.

    - Zahiriddin Muhammad Boburning hayoti va ijodi bilan tanishar ekanmiz, uning naqadar buyuk inson ekanligini anglaymiz, - deydi SamDU filologiya fakulteti talabasi Hilola Haydarova. – Yurtidan uzoqda bo’lsa ham Vataniga bo’lgan muhabbati, sog’inchi uni bir zum tark etmaganini ko’rishimiz mumkin. Bobur adolatli hukmdor bo’lishi bilan birga, adabiyot ixlosmandi ham edi. Uning “Boburnoma” asari voqealar bayoni aniq, ixcham va loʻnda, taʼsirchan, eng muhimi, hayotiy haqiqatga mos va muvofiqligi bilan eʼtiborlidir. Muallif voqealar bayonida tabiat tasviriga, ayrim joylar tavsifiga, alohida kishilarning taʼriflariga jiddiy ahamiyat beradi. Asarda oʻsha davr kishilarining haqqoniy, realistik tasviri berilgan. Bu narsa Boburning bergan maʼlumotlaridagi ishonchlilikni taʼminlagan. Asar bilan yaxshi tanishish Bobur xarakterini, undagi fazilatlar manbalarni aniqlashga imkon beradi…   

 

    Samarqand davlat universiteti

    Axborot xizmati.